REVO CUP 2025: O'zbekiston xususiy sektoridagi eng yirik IT musobaqasi qanday o'tdi?

O'zbekistonda IT ekotizimini jadal rivojlantirish, sog'lom raqobat muhitini yaratish va yosh iqtidorlarni kashf etish yo'lida REVO jamoasi navbatdagi katta qadamni tashladi. REVO Global kompaniyasining 5 yilligi munosabati bilan tashkil etilgan REVO DAY 2025 tadbiri doirasida, xususiy sektorda birinchilardan bo‘lib mamlakat miqyosidagi yirik sport dasturlash va kiberxavfsizlik olimpiadasi — REVO CUP 2025 muvaffaqiyatli o'tkazildi.

5-aprel kuni Urganch shahridagi IT Park binosida bo'lib o'tgan ushbu tadbir shunchaki musobaqa chegarasidan chiqib, mutaxassislar, startap asoschilari va yosh dasturchilar uchun chinakam IT hamjamiyati yig'ilishiga aylandi. Tadbirning to'liq jarayonini, sahnadagi chiqishlar va hayajonli lahzalarni bizning YouTube kanalimizdagi maxsus videoda tomosha qilishingiz mumkin.

"Biz ushbu musobaqani shunchaki g'oliblarni aniqlash uchun emas, balki O'zbekistonning IT kelajagini qadrlovchi, bilimli va shijoatli yoshlarni bir joyga jamlash maqsadida tashkil etdik. REVO CUP 2025 – bu yoshlarimiz va butun IT ekotizimimiz rivojiga qo'shayotgan jamoaviy hissamizdir." — Yo'ldoshboy Sultonov, REVO kompaniyasi asoschisi va direktori.

Qizg'in va murosasiz saralash bosqichlari (Online)

Musobaqaning shaffofligi va adolatliligini ta'minlash biz uchun eng ustuvor vazifa edi. Kep.uz platformasida bo'lib o'tgan onlayn saralash bosqichlaridayoq raqobat nihoyatda keskin kechdi:

• Sport dasturlash (CP) saralashi: 29-mart kuni bo'lib o'tgan bosqichda 670 nafar ishtirokchi ro‘yxatdan o‘tdi. 3 soat ichida 10 ta murakkab algoritmik masala berildi. Jami 3300 dan ortiq yechimlar yuborildi va 250 dan ortiq ishtirokchi kamida bitta masalani to'liq yechishga muvaffaq bo'ldi.

• Kiberxavfsizlik (CTF) saralashi: 30-mart kuni bo'lib o'tgan bosqichda 350 nafar ishtirokchi 4 soat davomida 11 ta murakkab topshiriqni bajarib, "Flag" topish ustida ishladi. 1440 dan ortiq yechim yuborildi va 100 dan ortiq qatnashchi masalalarni muvaffaqiyatli hal qildi.

Halollik – bizning bosh qoidamiz! Ikkala yo'nalishda ham javoblarni tarqatish, sun'iy intellekt va boshqa "cheat" vositalaridan foydalanish holatlari maxsus parametrlar orqali qat'iy tekshirildi. Natijada CP bo'yicha 40 dan ortiq, CTF bo'yicha esa 15 dan ortiq ishtirokchi diskvalifikatsiya qilindi. Faqatgina o'z bilimi va mehnati bilan kurashgan har bir yo'nalishdagi eng kuchli 40 nafar ishtirokchi (jami 80 kishi) Urganchdagi Grand Finalga yo'llanma oldi.

REVO DAY 2025: Kun tartibi, Spikerlar va Networking

5-aprel kuni ertalab soat 09:00 da boshlangan ro'yxatga olish jarayonida ishtirokchilar pasport nazoratidan o'tkazilib, ularga maxsus beyjiklar va tadbir atributlari tarqatildi. Kun davomida qatnashchilar va mehmonlar uchun quyidagi dastur tashkil etildi:

• 09:30 | StartUp MeetUp: Mutaxassislar tomonidan startaplarni g‘oyadan tortib mijozgacha bo‘lgan bosqichlari tahlil qilindi.

• 14:00 | Kiberxavfsizlik MeetUp: Soha ekspertlarining chiqishlari va interaktiv master-klasslar bo'lib o'tdi.

• 17:00 | Biznes va Avtomatlashtirish: TOP menejerlar va biznesmenlar ishtirokida biznesni rivojlantirish bo'yicha panel muhokamalari o'tkazildi.

Tadbir davomida qizg'in Networking muhiti hukm surdi. Dasturchilar, tadbirkorlar va talabalar o'zaro tajriba almashib, yangi hamkorlik aloqalarini o'rnatdilar. Ishtirokchilar bor e'tiborini faqat bilimga qaratishlari va charchab qolmasliklari uchun, kun davomida bepul oshxona va kofe-breyk imkoniyatlari yaratib berildi.

Final qoidalari va Bellashuv

Final bosqichi saralashga qaraganda ancha murakkab shartlar asosida o'tdi:

• Sport dasturlash (CP) finali (10:00 - 12:30): Ishtirokchilarga 2.5 soat vaqt berildi. Internetdan foydalanish qat'iyan taqiqlandi. Bellashuv faqat tashkilotchilar tomonidan taqdim etilgan kompyuterlarda olib borildi. Qatnashchilarga faqat o'zlari bilan olib kelgan 25 betlik algoritmlar yozilgan qog'ozdan foydalanishga ruxsat berildi. Natijalar ACM tizimi (yechilgan masalalar soni va sarflangan vaqt jarimasi) bo'yicha baholandi.

• Kiberxavfsizlik (CTF) finali (14:30 - 17:30): Ishtirokchilarga 3 soat vaqt ajratildi. Ular o'zlarining shaxsiy noutbuklarida internetdan foydalangan holda ishlashdi. Noutbuki yo'qlarga maxsus Windows kompyuterlari taqdim etildi.

G‘oliblar va mukofotlar

Umumiy mukofot jamg'armasi 80 000 000 so‘mdan ortiq bo'lgan ushbu musobaqa o'zining chinakam qahramonlarini aniqlab berdi.

🏆 Sport dasturlash (CP) yo‘nalishi g'oliblari:

• 🥇 1-o‘rin: Sunatullo Hojiyev — 12 000 000 so‘m

• 🥈 2-o‘rin: Asilbek Sunnatov — 9 000 000 so‘m

• 🥉 3-o‘rin: Jahonali Xaydaraliyev — 6 000 000 so‘m

• TOP-10 ishtirokchilar (har biriga 1 000 000 so'mdan): Miroqilov Davlatbek, Isamatdin Baybolov, Mansurbek Narzullayev, Timur Kadirbergenov, Jamshid Kodirov, Matkarimov Sardor, Valixon Yuldashov.

• Eng tezkor ishtirokchi: Miroqilov Davlatbek (Asaxiy Plus’dan 365 kunlik obuna).

• Eng faol qiz ishtirokchi: Ismoilova Anaxon (Asaxiy Plus’dan 365 kunlik obuna).

🏆 Kiberxavfsizlik (CTF) yo‘nalishi g'oliblari:

• 🥇 1-o‘rin: Umurzoqov Quvonchbek — 12 000 000 so‘m

• 🥈 2-o‘rin: Abdukarimov Ziyodulla — 9 000 000 so‘m

• 🥉 3-o‘rin: Javlonbek Uralov — 6 000 000 so‘m

• TOP-10 ishtirokchilar (har biriga 1 000 000 so'mdan): Sardorbek Omonov, Shermatov Davlatbek, Ergashbekov Nurbek, Jaxongir Sharipov, Suhayl Qodirov, O‘ktamov Shohjahon, Jamshidbek Atajonov.

• Eng faol qiz ishtirokchi: Ibadullayeva Zebiniso (Asaxiy Plus’dan 365 kunlik obuna).

Ikkala yo'nalish bo'yicha TOP-10 talikka kirgan barcha ishtirokchilarni yana bir bor tabriklaymiz. Ushbu olimpiadaga shunchalik ko'p yoshlar qiziqish bildirgani va ayniqsa, ishtirokchilar hamda sovrindorlar orasida maktab o'quvchilarining borligi bizni cheksiz quvontirdi. Bu yosh avlodning IT sohasiga bo'lgan kuchli ishtiyoqidan va salohiyatidan dalolat beradi. Kelgusi rejalarimizda ham xuddi shunday yirik IT-konferensiyalar va olimpiadalarni muntazam o'tkazib borish maqsad qilingan. Chunki REVO – bu shunchaki kompaniya emas, balki O'zbekistonning raqamli kelajagini qurayotgan, yosh iqtidorlarni qo'llab-quvvatlovchi va mutaxassislarni birlashtiruvchi ulkan hamjamiyatdir. Biz bilan birga bo'lgan barchaga minnatdorchilik bildiramiz!

Bizni ijtimoiy tarmoqlarda kuzatib boring: @RevolutionGlobalLLC